Microsoft : जगभरातील विंडोजवर काम करणाऱ्या सर्व आयटी प्रणाली, संगणक आणि लॅपटॉप शुक्रवारी अचानक बंद झाले. भारत, ऑस्ट्रेलिया, जर्मनी, अमेरिका, ब्रिटन आणि इतर देशांसह जगभरातील अनेक देशांना याचा फटका बसला आहे. त्यामुळे बहुतांश विमान कंपन्या, बँका, शेअर बाजार, परदेशी रेल्वे सेवा आणि मीडिया हाऊसचे कामकाज ठप्प झाले आहे. त्यामागचे कारण संगणकाच्या ऑपरेटिंग सिस्टीम विंडोजमधील तांत्रिक समस्या असल्याचे सांगितले जात आहे. भारतासह जगभरातील पेमेंट सिस्टमवरही परिणाम झाला आहे. जगभरात लाखो लोक मायक्रोसॉफ्टचा वापर करतात. पण शुक्रवारी अचानक मायक्रोसॉफ्टचा सर्व्हर बंद झाला. मायक्रोसॉफ्टचा वापर करणाऱ्यांना तांत्रिक अडचणींचा सामना करावा लागत आहे. भारतीय वेळेनुसार दुपारी साधारण १२.३० दरम्यान मायक्रोसॉफ्टचा सर्व्हर ठप्प झाला. अनेक युजर्सला ब्लू स्क्रीनची समस्या आली. त्यानंतर अचानक काही डिव्हाईस बंद झाले. यानंतर आता कंपनीने याबद्दल एक संदेश पाठवला आहे. “तुमच्या डिव्हाईसमध्ये काहीतरी तांत्रिक बिघाड झाल्याने तो रिस्टार्ट करण्याची गरज आहे. आम्ही हा तांत्रिक बिघाड दुरुस्त करण्याचा प्रयत्न करत आहोत. तो दुरुस्त झाल्यानंतर तुमचा डिव्हाईस रिस्टार्ट करता येईल”, असे मायक्रोसॉफ्टने नमूद केले आहे.
ब्रिटनची आघाडीची वृत्तवाहिनी स्काय न्यूजलाही याचा फटका बसला असून तो बंद झाला आहे. “स्काय न्यूज आज सकाळी थेट टीव्ही प्रसारित करण्यात अक्षम आहे, यावेळी आम्ही व्यत्ययाबद्दल दर्शकांची माफी मागतो,” ब्रॉडकास्टरचे कार्यकारी अध्यक्ष डेव्हिड रोड्स यांनी ट्विटरवर सांगितले. जागतिक तांत्रिक बिघाडामुळे स्पॅनिश विमानतळ, ब्रिटीश रेल्वे सेवा, तुर्की विमानसेवा आणि ऑस्ट्रेलियन मीडिया आणि बँकांसह विविध देशांतील कामकाजावर परिणाम झाला आहे. मायक्रोसॉफ्टचे सर्व्हर ठप्प झाले, ज्यामुळे बँकांपासून ते जगभरातील एअरलाइन्सच्या फ्लाइटपर्यंत सर्व काही विस्कळीत झाले.
इंग्लंडमधील डॉक्टरांनी वापरलेली हेल्थ बुकिंग सिस्टम ऑफलाइन झाली आहे. याशिवाय लंडन स्टॉक एक्सचेंजची सेवाही विस्कळीत झाली असून ती बंद करण्यात आली आहे. नुवामा, एडलवाईस आणि मोतीलाल ओसवाल यांच्यासह अनेक ब्रोकरेज कंपन्यांना तांत्रिक अडचणींचा सामना करावा लागला. ऑस्ट्रेलियातील बँका, दूरसंचार, मीडिया आऊटलेट्स आणि एअरलाइन्सच्या सेवा प्रभावित झाल्या आहेत . ऑस्ट्रेलियाच्या नॅशनल सायबर सिक्युरिटी कोऑर्डिनेटरने सांगितले की, “आज दुपारी एक मोठी तांत्रिक बिघाड झाल्याने ऑस्ट्रेलियातील अनेक कंपन्या आणि सेवा प्रभावित झाल्या आहेत. देशाचे राष्ट्रीय प्रसारक, त्याचे सर्वात मोठे आंतरराष्ट्रीय विमानतळ आणि एका मोठ्या टेलिकम्युनिकेशन कंपनीने या संदर्भात तक्रार केली आहे.
अमेरिकेतील अनेक भागांमध्ये इमर्जन्सी 911 सेवा विस्कळीत झाली असून या बिघाडामुळे आपत्कालीन कॉल सेंटरही काम करत नाहीत. अमेरिकन एअरलाइन्स, डेल्टा आणि युनायटेडसह प्रमुख यूएस एअरलाइन्सनी सर्व उड्डाणे थांबवली आहेत. जगातील सर्वात व्यस्त विमानतळांपैकी एक असलेल्या सिंगापूरच्या चांगी विमानतळाने एक निवेदन जारी केले आहे की चेक-इन प्रक्रिया मॅन्युअली व्यवस्थापित केली जात आहे. स्पेन विमानतळावरील आयटी सेवेवर वाईट परिणाम झाला आहे. तर जर्मनीमध्ये विमाने टेक ऑफ करू शकत नाहीत. भारतात, आउटेजमुळे विमानतळांवर मोठ्या प्रमाणावर उड्डाणांना विलंब झाला. आउटेजमुळे इंडिगो, आकासा एअरलाइन्स आणि स्पाइसजेटसह अनेक विमान कंपन्यांच्या बुकिंग आणि चेक-इन सेवांवर परिणाम झाला. तर माहिती प्रणालीतील जागतिक तांत्रिक समस्येमुळे, तुर्की एअरलाइन्सला तिकीट, चेक-इन आणि आरक्षणामध्ये देखील समस्या येत आहेत.
CrowdStrike म्हणजे काय?
CrowdStrike ही एक सायबर सुरक्षा फर्म आहे जी कंपन्यांना त्यांचे IT वातावरण सुरक्षित करण्यात मदत करते. सोप्या शब्दात सांगायचे तर, कंपनी इंटरनेटच्या मदतीने कोणतेही काम करते, CrowdStrike त्यांना हॅकर्सपासून सुरक्षित ठेवण्यात मदत करते. हॅकर्स, सायबर हल्ले, रॅन्समवेअर आणि डेटा लीकपासून कंपन्यांचे संरक्षण करणे हे त्याचे मुख्य कार्य आहे. यामुळेच या कंपनीचे प्रमुख ग्राहक जगभरातील मोठ्या बँका, विद्यापीठे आणि सरकारी संस्था आहेत. अलीकडच्या काळात सायबर विश्वात खूप बदल झाले आहेत. हॅकर्सच्या वाढत्या हल्ल्यांमुळे, CrowdStrike सारख्या फर्मवर कंपन्यांचे अवलंबित्व वाढले आहे.
हे ही वाचा:
घटस्फोटाची घोषणा करत HARDIK PANDYA यांनी केले चाहत्यांना आवाहन
