यंदाच्या वर्षी ७ सप्टेंबरला गणपती बाप्पाचे आगमन होणार आहे. त्यामुळे सध्या देशभरात सगळीकडे गणपती बाप्पाच्या आगमनाची जोरदार तयारी सुरु आहे. मुंबई, पुण्यासह कोकणात मोठ्या उत्साहात आणि आनंदात गणपती बाप्पाचे आगमन केले जाते. सर्वच लोक वर्षभर बाप्पाच्या आगमनाची आतुरतेने वाट पाहत असतात. बाप्पा घरी आल्यावर त्याची मनोभावे पूजा करून त्याला गोडाचा नैवेद्य दाखवला जातो. गणपतीची मनोभावे सेवा, पूजा करण्यासाठी सगळेच भक्त आतुर असतात. त्यामुळे सगळ्यांच्या लाडक्या बाप्पाला नैवेद्याला काही खास पदार्थ नक्की बनवा. आज आपण गणपतीच्या नैवेद्यासाठी पनीरपासून कलाकंद कसा बनवायचा याची अगदी सोपी रेसिपी पाहणार आहोत. हा स्वादिष्ट पनीर कलाकंद तुमच्या कुटुंबासाठी आणि मित्रांसाठी खास प्रसंगी बनवू शकता.
साहित्य:
- पनीर – २५० ग्रॅम (फ्रेश आणि मऊ)
- साखर – १/२ कप (आवश्यकतेनुसार कमी-जास्त करू शकता)
- दूध – १/४ कप
- वेलची पूड – १/२ टी स्पून
- पिस्ते, बदाम काप – सजावटीसाठी
- तूप – १/२ टी स्पून
कृती:
- एका जाड बुडाच्या पातेल्यात, पनीर घाला आणि त्यात १/४ कप दूध घालून मिक्स करा.
- हे मिश्रण मध्यम आचेवर शिजवायला सुरू करा आणि सतत ढवळत राहा.
- ५-७ मिनिटांनी, मिश्रण घट्ट होऊ लागेल. तेव्हा त्यात साखर घाला आणि पुन्हा मिक्स करा.
- साखर विरघळेपर्यंत मिश्रण शिजवा. तुम्हाला हवे असल्यास साखर अजून घालू शकता.
- मिश्रण घट्ट होऊ लागल्यावर त्यात वेलची पूड घाला आणि मिक्स करा.
- एका ट्रेला किंवा ताटलीला तूप लावा.
- तयार केलेले कलाकंद मिश्रण त्यात ओतून घ्या.
- मिश्रण समान रीतीने पसरवून त्याला गार होण्यासाठी ठेवा.
- वरून पिस्ते, बदामाचे काप घाला.
- कलाकंद पूर्णपणे सेट झाल्यावर त्याला तुकड्यांमध्ये कापा.
- पनीर कलाकंद तयार आहे, सर्व्ह करा आणि आनंद घ्या.
टीप:
कलाकंद तयार करताना गॅसची आच मध्यम ठेवा आणि मिश्रण सतत ढवळत राहा, नाहीतर ते खाली लागू शकते.