चाहते कंगना राणौतच्या ‘इमर्जन्सी’ या चित्रपटाची आतुरतेने वाट पाहत आहेत. हा चित्रपट यापूर्वी ६ सप्टेंबर रोजी चित्रपटगृहात प्रदर्शित होणार होता, परंतु सेन्सॉर बोर्डाकडून प्रमाणपत्र न मिळाल्याने हा चित्रपट पुढे ढकलावा लागला होता. आता या चित्रपटाच्या प्रदर्शनावर मुंबई उच्च न्यायालयात सुनावणी झाली असून सेन्सॉर बोर्डानेही त्यावर प्रतिक्रिया दिली आहे.
झी एंटरटेनमेंट एंटरप्रायझेस लिमिटेडने सीबीएफसी बेकायदेशीरपणे ‘इमर्जन्सी’ थांबवत असल्याचा आरोप केला होता. सीबीएफसीचे वकील अभिनव चंद्रचूड यांनी न्यायमूर्ती बीपी कुलाबावाला आणि फिरदौस पूनीवाला यांच्या खंडपीठाला सांगितले की, सीबीएफसीच्या सुधारित समितीने चित्रपटात काही कपात करण्याची सूचना केली आहे. चित्रपट समितीच्या पुनरावृत्ती समितीच्या सूचनेनुसार काही कट केल्यासच अभिनेत्री आणि भाजप खासदार कंगना राणौतचा ‘इमर्जन्सी’ चित्रपट प्रदर्शित होऊ शकतो, अशी माहिती CBFCने गुरुवारी मुंबई उच्च न्यायालयाला दिली .
झी च्या वतीने उपस्थित असलेले वकील शरण जगतियानी यांनी एक कागदपत्र दाखवले ज्यामध्ये चित्रपट प्रदर्शित होण्यापूर्वी 11 दुरुस्त्या कराव्या लागतील. सुचवलेल्या ११ दुरुस्त्यांमध्ये चित्रपटातील काही कट समाविष्ट आहेत. आता ते या दुरुस्त्या मान्य करतात की आव्हान देतात हे चित्रपट निर्मात्यांवर अवलंबून आहे. आता या याचिकेवर ३० सप्टेंबर रोजी सुनावणी होणार आहे. हा चित्रपट रिलीज होण्याआधीच त्याच्यावर बंदी घालण्याची मागणी जोर धरू लागली होती. पंजाब, तेलंगणा, नवी दिल्ली आणि उत्तर प्रदेशमधील लोकांनी चित्रपटावर बंदी घालण्याची मागणी केली होती आणि दावा केला होता की चित्रपटाने त्यांच्या समुदायाला नकारात्मक प्रकाशात चित्रित केले आहे आणि इतिहासाशी छेडछाड केली आहे. कंगना राणौतने इमर्जन्सी दिग्दर्शित केली आहे. या चित्रपटात अनुपम खेर, श्रेयस तळपदे, मिलिंद सोमण यांच्यासह अनेक कलाकार महत्त्वाच्या भूमिका साकारताना दिसणार आहेत.
चित्रपटातील एका दृश्यात असं दाखवलंय की एका विशिष्ट व्यक्तीने राजकीय पक्षांसोबत करार केला होता. या दृश्याची वास्तविक अचूकता किती आहे, हे तपासून प्रमाणपत्राचा निर्णय घेऊ, असं सेन्सॉर बोर्डाने न्यायालयाला सांगितलं होतं. आता सुधारित समितीने चित्रपटात काही कट्स सुचवल्याचं सेन्सॉर बोर्डाने न्यायालयात सांगितलं आहे. त्यानुसार कट्सचा विचार करू असं झी एंटरटेन्मेंटच्या वकिलांनी स्पष्ट केलंय.
हे ही वाचा:
PM Modi Pune Visit Cancelled: मुसळधार पावसाच्या शक्यतेमुळे पंतप्रधान मोदींचा Pune दौरा रद्द