बॉलीवूडचा किंग खान शाहरुख खान सध्या त्याच्या आगामी ‘डंकी’ या चित्रपटामुळे प्रचंड चर्चेत आहे. लवकरच ‘डंकी’ हा चित्रपट प्रेक्षकांच्या भेटीला येणारं आहे. ‘जवान’ आणि ‘पठाण’ या चित्रपटानी यंदा बॉक्स ऑफिसवर आपला चांगलाच जम बसवला.त्यामुळे आता ‘डंकी’ या चित्रपटाकडे सगळ्यांच्या नजरा खिळल्या आहेत.दरम्यान हा चित्रपट देखील ऑफिसवर हिट ठरेल अशी सगळ्यांची अपेक्षा आहे.राजकुमार हिरानींच्या ‘डंकी’कडून किंग खानच्या चाहत्यांना मोठ्या अपेक्षा आहेत. नुकताच या चित्रपटाचा ट्रेलर प्रेक्षकांच्या भेटीला आला. ट्रेलर प्रदर्शित झाल्याच्या निमित्ताने शाहरुखने सोशल मीडियावर ‘आस्क मी सेशन’ घेतलं. यामध्ये त्याच्या चाहत्यांनी त्याला विविध प्रश्न विचारले.
शाहरुखला त्याच्या एका चाहत्याने विचारलं, “माझी बायको ६ महिन्यांची गरोदर आहे तरीही तिला तुमचा चित्रपट पाहायचा आहे…मी काय सांगू आता तिला?” चाहत्याने विचारलेल्या या वैयक्तिक प्रश्नाला सुद्धा किंग खानने एकदम दिलखुलासपणे आणि भन्नाट उत्तरं देत सर्वांचं लक्ष वेधून घेतलं.
किंग खान त्याच्या चाहत्याला उत्तर देत म्हणाला, “‘डंकी’ हा चित्रपट लहान मुलं देखील पाहू शकतात. त्यामुळे तू तिला तुझ्याबरोबर घेऊन येऊ शकतोस. फक्त सिनेमागृहात जाताना तिच्यासाठी उशी घेऊन जा…जेणेकरुन ती एकदम आरामात बसून चित्रपट पाहू शकते. तुम्हाला बाळासाठी खूप खूप शुभेच्छा!” शाहरुखचं उत्तर पाहून नेटकऱ्यांनी कमेंट सेक्शनमध्ये त्याच्यावर कौतुकाचा वर्षाव करण्यास सुरूवात केली आहे.
दरम्यान, येत्या २१ डिसेंबरला शाहरुख खानचा ‘डंकी’ चित्रपट प्रदर्शित होणार आहे. जर ‘जवान’, ‘पठाण’प्रमाणे ‘डंकी’नेही बॉक्स ऑफिसवर १ हजार कोटींचा गल्ला जमावला, तर यंदाचं वर्ष हे किंग खानसाठी खऱ्या अर्थाने ब्लॉकबस्टर ठरणार आहे. या चित्रपटाची कथा अवैध स्थलांतरावर आधारित आहे. यापूर्वी राजकुमार हिरानी दिग्दर्शित ‘संजू’, ‘पीके’, ‘३ इडियट्स’ या सगळ्या चित्रपटांना प्रेक्षकांनी डोक्यावर घेतलं होतं. त्यामुळे ‘डंकी’ चित्रपटाकडून शाहरुखच्या चाहत्यांसह संपूर्ण बॉलीवूड इंडस्ट्रीला मोठ्या अपेक्षा आहेत.आणि या चित्रपटासाठी प्रेक्षकांमधील उस्तुकत्ता शिगेला पोहचली आहे.
हे ही वाचा:
विधिमंडळाच्या हिवाळी अधिवेशनाला आजपासून सुरुवात
उद्यापासून होणाऱ्या हिवाळी अधिवेशनाआधी मुख्यमंत्री – उपमुख्यमंत्र्यांची पत्रकार परिषद