गायक दलेर मेहंदीला कोर्टाने दिला दिलासा

पंजाबी गायक दलेर मेहंदीला १९ वर्षे जुन्या प्रकरणात दोन वर्षांची शिक्षा सुनावण्यात आली होती. यामुळे दलेर मेहंदीला (Daler Mehndi) तुरुंगात जावे लागले होते. आता पंजाब आणि हरयाणा उच्च न्यायालयाने गायक दलेर मेहंदीला दिलासा (Bail) दिला. २००३ च्या मानवी तस्करी प्रकरणात दोन वर्षांच्या तुरुंगवासाची शिक्षा झालेल्या पटियाला कोर्टाच्या निर्णयाला स्थगिती दिली आहे.

हे १९ वर्षे जुने प्रकरण मानवी तस्करीशी संबंधित आहे. दलेर मेहंदीसोबत भाऊ समशेर सिंगही या प्रकरणात आरोपी होता. २०१७ मध्ये त्याचे निधन झाले. मार्च २०१८ मध्ये दलेर मेहंदी (Daler Mehndi) या प्रकरणात दोषी आढळला होता. त्यानंतर दलेर मेहंदीला आयपीसीच्या कलम ४२० आणि १२०-बी मध्ये दोषी ठरवण्यात आले होते.

बक्षी सिंग नावाच्या व्यक्तीने पटियाला सदर पोलिस ठाण्यात तक्रार दाखल केली होती. दलेर मेहंदी आणि भाऊ समशेर यांनी त्याला कॅनडाला पाठवण्यासाठी १३ लाख घेतल्याचा आरोप केला होता. परंतु, ना कॅनडाला पाठवले ना पैसे परत केले. बक्षी सिंहसोबत इतर ३० तक्रारकर्ते होते. ज्यांनी दलेर मेहंदीवर असे आरोप केले होते.