म्हाडाच्या (Maharashtra Housing and Area Development Authority) मुंबई गृहनिर्माण आणि क्षेत्र विकास मंडळातर्फे लवकरच नवीन घरांची सोडत जाहीर करण्यात येणार आहे. म्हाडाची यंदाची घरासाठीची सोडत ही एकूण ४०८२ घरांसाठी आहे. याच ४०८२ घरांच्या विक्रीच्या ऑनलाईन सोडत प्रक्रियेला अर्जदारांनी भरभरून प्रतिसाद दिला आहे. १,४५,८४९ अर्ज ऑनलाईन सोडत प्रक्रियेमध्ये प्राप्त झाले आहेत. यापैकी १,१९,२७८ अर्जदारांनी अद्यापपर्यंत अनामत रकमेचा भरणा करून सोडत प्रक्रिया पूर्ण केली आहे.
मुंबईतील विविध गृहनिर्माण प्रकल्पांतर्गत ४०८२ सदनिकांच्या विक्रीसाठी २२ मे, २०२३ रोजी दुपारी ३ वाजेपासून ऑनलाईन अर्ज नोंदणी आणि स्वीकृती प्रक्रियेला सुरुवात झाली. ऑनलाईन अशा IHLMS २.० याद्वारे ही सोडत प्रक्रिया राबविण्यात आली आहे. सोडतीमधील अत्यल्प उत्पन्न गटात पहाडी गोरेगाव पश्चिम येथील प्रधानमंत्री आवास योजनेतील सदनिका तसेच अन्टॉप हिल आणि विक्रोळीच्या कन्नमवार नगरमधील सदनिकांचा समावेश आहे. अल्प उत्पन्न गटकरता पहाडी गोरेगाव, लोकमान्य नगर दादर, अँटॉप हिल वडाळा, सिद्धार्थनगर – गोरेगाव पश्चिम, डीएन नगर-अंधेरी, पंत नगर-घाटकोपर, कन्नमवार नगर विक्रोळी, चारकोप कांदिवली, महावीर नगर कांदिवली, जुने मागाठाणे बोरिवली, गव्हाणपाडा मुलुंड, पीएमजीपी मानखुर्द, मालवणी मालाड आदी ठिकाणी सदनिका उपलब्ध आहेत. तसेच, उन्नतनगर गोरेगाव पश्चिम, महावीर नगर कांदिवली, जुहू, अंधेरी पश्चिम, अंधेरी पूर्व, सहकार नगर चेंबुर, लोकमान्य नगर दादर, अँटॉप हिल वडाळा, भायखळा, टिळकनगर चेंबुर, चांदिवली पवई, गायकवाड नगर मालाड, प्रतीक्षा नगर सायन, चारकोप कांदिवली येथील गृहप्रकल्पांतर्गत मध्यम उत्पन्न गटातील सदनिकांचा समावेश आहे. उच्च उत्पन्नमध्ये जुहू-अंधेरी पश्चिम, वडाळा पश्चिम, ताडदेव, लोअर परळ, शिंपोली कांदिवली, तुंगा पवई, चारकोप कांदिवली, सायन पूर्व येथील सदनिकांचा समावेश आहे.
म्हाडा सोडतीच्या ऑनलाईन प्रणालीमध्ये उत्पन्न गटनिहाय अत्यल्प उत्पन्न गटातील ८४३ सदनिकांकरीता ३५,२३१ अर्ज प्राप्त झाले आहेत, अल्प उत्पन्न गटातील १०३४ सदनिकांकरीता ७३,४१४ अर्ज प्राप्त झाले आहेत, मध्यम उत्पन्न गटातील १३८ सदनिकांकरीता १०,५०० अर्ज प्राप्त झाले आहेत आणि उच्च उत्पन्न गटातील १२० सदनिकांसाठी २९२८ अर्जदारांनी अर्ज केले आहेत. तसेच, प्रधान मंत्री आवास योजने अंतर्गत १९४७ सदनिकांसाठी २३७७६ अर्ज प्राप्त झाले आहेत. सदनिकांच्या वितरणाकरता प्राप्त अर्जांची ऑनलाईन सोडत वांद्रे पश्चिम येथील रंगशारदा नाट्यगृहात काढण्यात येणार असून सोडतीचा दिनांक आणि वेळ लवकरच जाहीर करण्यात येणार आहे.
मुंबई मंडळातर्फे अर्ज भरणा करण्याची मुदत ११ जुलै रोजी संपली, तसेच RTGS / NEFT द्वारे अनामत रकमेचा भरणा अर्जदार १२ जुलै, २०२३ रोजी संबंधित बँकेच्या कार्यालयीन वेळेपर्यंत करू शकतील. १७ जुलै २०२३ रोजी दुपारी ३ वाजता सोडतीसाठी प्राप्त झालेल्या अर्जांची प्रारूप यादी म्हाडाच्या अधिकृत संकेतस्थळावर प्रसिद्ध केली जाणार आहे. १९ जुलै, २०२३ रोजी दुपारी ३ वाजेपर्यंत प्रारूप यादी प्रसिद्ध झाल्यापासून ऑनलाईन दावे-हरकती दाखल करता येणार आहेत. २४ जुलै, २०२३ रोजी दुपारी तीन वाजता सोडतीसाठी स्विकृत अर्जांची अंतिम यादी म्हाडाच्या संकेतस्थळावर प्रसिद्ध केली जाणार आहे.
हे ही वाचा:
पंतप्रधान मोदी दोन दिवसीय फ्रान्स दौऱ्यावर
अशोक मामांबद्दल खुद्द निवेदिता सराफ यांनी केला खुलासा