शनिवारी दि. ७ सप्टेंबरला आपल्या लाडक्या बाप्पाचे आगमन झाले असून सगळीकडे उत्साहाचं आणि आनंदाचं वातावरण आहे. अशातच गृहमंत्री अमित शाह (Amit Shah) हे दोन दिवसीय मुंबई दौऱ्यावर आले आहेत. ८ सप्टेंबर रोजी त्यांचे मुंबईत आगमन झाले. दरम्यान या दौऱ्यात त्यांनी मुख्यमंत्री एकनाथ शिंदे (Eknath Shinde) आणि उपमुख्यमंत्री देवेंद्र फडणवीसांच्या (Devendra Fadanavis) निवासस्थानी जाऊन बाप्पाचे दर्शन घेतले. तसेच आज दि. ९ सप्टेंबरला त्यांनी लालबागच्या राजाचे ही दर्शन घेतले.
केंद्रीय गृहमंत्री अमित शाह यांनी आज मुख्यमंत्र्यांच्या वर्षा निवासस्थानी भेट देत गणरायाचे दर्शन घेतले. यावेळी मुख्यमंत्री एकनाथ शिंदे यांनी गृहमंत्री शाह यांचे स्वागत केले. गृहमंत्री शाह यांच्या हस्ते गणपतीची आरती करण्यात आली. यावेळी मुख्यमंत्री शिंदे आणि खासदार डॉ. श्रीकांत शिंदे यांच्या हस्ते केंद्रीय गृहमंत्री शाह यांचे शाल, श्रीफळ देवून सत्कार करण्यात आला. तसेच त्यांना ‘शासन आपल्या दारी’ पुस्तकाची प्रत आणि गणपतीची मूर्ती भेट म्हणून देण्यात आली. मुख्यमंत्र्यांच्या स्नुषा वृषाली शिंदे यांनी गृहमंत्री शाह यांचे औक्षण करीत स्वागत केले.
यावेळी राज्याचे उपमुख्यमंत्री देवेंद्र फडणवीस, मंत्री दीपक केसरकर, मंगल प्रभात लोढा, माजी केंद्रीय राज्यमंत्री रावसाहेब दानवे, आमदार चंद्रशेखर बावनकुळे आदी मान्यवर उपस्थित होते. यावेळी गृहमंत्री शाह यांनी मुख्यमंत्री शिंदे, खासदार डॉ. श्रीकांत शिंदे, स्नुषा वृषाली यांच्याशी संवाद साधला.
हे ही वाचा:
गृहमंत्री अमित शाह सपत्नीक लालबाग राजाच्या चरणी लीन
वारकरी संप्रदायाकडून समाज घडविण्याचे कार्य – CM Eknath Shinde