देशातील विविध ठिकाणी मकर संक्रांतीचा शुभ सण मोठ्या उत्साहात साजरा केला जातो. शेजारी, नातेवाईक आणि जवळच्या मित्रांशी यादिवशी भेटणं होतं. अशा परिस्थितीत काय परिधान करावे, या प्रसंगी काय चांगले आणि स्टाइलिश दिसेल आणि हिवाळ्यासाठी देखील योग्य ठरेल? असे एक ना अनेक प्रश्न आपल्याला पडत असतात. तर तुम्हाला पडलेल्या याच प्रश्नाचे उत्तर आम्ही देणार आहोत. चला तर मग जाणून घेऊया काही पारंपरिक पण ट्रेंडी मकरसंक्रांती स्पेशल आऊटफिट्सबद्दल.
गेल्या वर्षीपासून आणि अगदी या वर्षातही मुलींच्या आवडत्या पोशाखात पाकिस्तानी सूटचा समावेश आहे. त्याचा लुक आणि डिझाईन अशी आहे की तुम्ही तो सण आणि पार्ट्यांव्यतिरिक्त इतर दिवशीही अगदी आरामात वापरू शकता. आरामदायी फॅब्रिक असलेल्या लांब पाकिस्तानी कुर्त्यांमध्ये लेसवर्क आणि भरतकाम केल्यामुळे ते सणांच्यादिवशी अजून उठून दिसतात. त्याचबरोबर खाली शरारा किंवा मग सलवार घालून तुम्ही तुमचा हा फेस्टिव्ह लुक पूर्ण करू शकता.
पटीयाला सूट सणासुदीच्या प्रसंगी वापरला जाणारा अजून एक आउटफिट आहे जो फॅशनच्या जगतात अजूनही आपले स्थान पक्के करून आहे. पटियाला हा स्टायलिश देखील दिसतो आणि तो खूप आरामदायक देखील असतो. तसेच वेगवेगळे पॅटर्न आणि रंग एकत्र करून एक सुंदर पटियाला सूट तुम्ही मकरसंक्रांतीला घालू शकता.
पारंपारिक पोशाखांमध्ये ग्लॅमरस दिसण्यासाठी तुम्ही यावेळी साडीपासून शिवलेला गाऊन देखील वापरू शकता. बाजारात सध्या साडीपासून तयार केलेले रेडिमेड गाऊन सहज उपलब्ध आहेत. तसेच, तुम्ही तुमच्याकडची कोणतीही साडी वापरून तुम्हाला हवा तसा गाऊन शिवून देखील घेऊ शकता. सध्या पैठणी किंवा काठापदराच्या साडीपासून शिवलेले गाऊन खूप ट्रेंडमध्ये आहेत.
पूर्वी कुर्त्यासोबतचा लुक पूर्ण करण्यासाठी वेगवेगळ्या प्रकारच्या ओढण्या वापरण्याची फॅशन होती पण आता त्याची जागा जॅकेटने घेतली आहे. तुमच्या एथनिक लुकमध्ये स्वॅग ऍड करण्यासाठी तुम्ही फुल स्लीव्ह, स्लीव्हलेस, ब्रोकेड, मिरर, एम्ब्रॉयडरी केलेले लाँग आणि शॉर्ट्स जॅकेट कोणत्याही प्रकारच्या कुर्त्यासोबत घालू शकता आणि त्याखाली कोणतीही जीन्स किंवा मग एखादी लेगिंग्ज देखील वापरू शकता.
पारंपरिक पोशाखांचा विषय आला कि साड्यांना नेहमीच पहिली पसंती दिली जाते. पण मकर संक्रांतीच्या शुभ मुहूर्तावर कॉटन, शिफॉन आणि जॉर्जेट व्यतिरिक्त सिल्कच्या साड्या देखील तुम्ही वापरू शकता. अशा प्रसंगी घालण्यासाठी आणि तुम्हाला रॉयल लुक देण्यासाठी रंगीत सिल्क साड्या हा उत्तम पर्याय आहे.
