महाराष्ट्र नवनिर्माण सेनेचे अध्यक्ष राज ठाकरे (Maharashtra Navnirman Sena President Raj Thackeray) मंगळवारी दि. २९ नोव्हेंबर रोजी कोल्हापूर दौऱ्यावर जाणार आहेत. राज ठाकरे यांची मंगळवारी सर्किट हाऊसमध्ये मनसे शहर-जिल्हा कार्यकारणी आणि पदाधिकारी यांच्यासोबत बैठक होणार आहे.
मनसे अध्यक्ष राज ठाकरे यांनी गेल्या काही दिवसांपासून पक्षातील पदाधिकाऱ्यांची चांगलीच कानउघाडणी केली. मनसेच्या बैठकीत राज ठाकरे यांनी काम न करणाऱ्या पदाधिकाऱ्यांना खडे बोल सुनावले आहेत. त्यामुळे कोल्हापूरमधील मनसैनिकांना ते काय कानमंत्र देणार? याकडे लक्ष लागले आहे.
बुधवारी सकाळी १० वाजता राज ठाकरे करवीर निवासिनी अंबाबाईचे दर्शन घेतील. त्यानंतर दुपारी ते सावंतवाडीकडे रवाना होतील. सायंकाळी ५ वाजता सावंतवाडी येथे पोहोचतील. कुडाळ येथे मुक्काम असेल. राज ठाकरे ३० नोव्हेंबर ते ६ डिसेंबर २०२२ या कालावधीत सिंधुदुर्ग, रत्नागिरी जिल्हा दौऱ्यावर आहेत.
दरम्यान, पक्षाचे अध्यक्ष राज ठाकरे यांनी मनसे पदाधिकाऱ्यांची आज वांद्रे एमआयजी क्लब इथे बैठक बोलावली आहे. मुंबई महानगरपालिका निवडणुकीच्या तयारीच्या दृष्टीने ही बैठक आयोजित करण्यात आली आहे. मुंबईतील लोकसभा निहाय परिस्थितीचा राज ठाकरे आढावा घेणार आहेत. मुंबईतील सहा लोकसभा मतदारसंघातील मनसे पदाधिकाऱ्यांशी राज ठाकरे या बैठकीत संवाद साधणार आहे. त्याचसोबत २७ नोव्हेंबरला मुंबईत मनसे गट नेत्यांचा जो मेळावा होणार आहे त्याच्या तयारीचाही आढावा घेतला जाणार आहे. मनसेने याआधीच निवडणुका स्वबळावर लढण्याचा नारा दिला आहे.
दरम्यान,राज्यात लवकरच निवडणुका लागतील असं भाकित राज ठाकरे यांनी वर्तवलं आहे. राज ठाकरे यांच्या वक्तव्याने चर्चांना उधाण आलं आहे. राज्यात लवकरच कोणत्या निवडणुका होणार आहेत, याबाबत तर्कवितर्क लढवले जात आहेत. “मी आता भाषणाला उभा नाही. मी सध्या घशाला आराम देतो. कारण जानेवारीपासून बोंबल बोंबल बोंबलायचंच आहे. निवडणुका लागतील. घसा एवढ्यासाठीच बोललो कारण गळा हा लता मंगेशकर वगैरे या लोकांसारखा असतो. घसाच आपला असतो. त्यामुळे घशाला जरा आराम देतोय,” असं राज ठाकरे म्हणाले. मुंबईतील परळमधल्या कामगार मैदानात मनसेतर्फे कोकण महोत्सव आयोजित करण्यात आला होता. त्यावेळी राज ठाकरे बोलत होते.
हे ही वाचा:
Shivsena : ठाकरे गटातील शिवसेनेच्या महिला नेत्यांत गटबाजी?
CM Eknath Shinde : मुख्यमंत्री एकनाथ शिंदे आज कोल्हापूर जिल्हा दौऱ्यावर
प्रदेशाध्यक्ष चंद्रशेखर बावनकुळेंचा दोन दिवसीय दौरा; लक्ष शिवसेनेच्या बालेकिल्ल्यावर